Advertise with Giraya
NEWS

නිවසේ ස්වයං නිරෝධායනය වෙමින් සිටි පුද්ගලයෙක් ජීවිතක්ෂයට

කුලියාපිටිය, ගයියාල ප‍්‍රදේශයේ නිවසක නිරෝධායනය වෙමින් සිටි පුද්ගලයෙකු මියගොස් ඇතැයි කුලියාපිටිය සෞඛ්‍ය වෛද්‍ය කාර්යාලය පවසනවා. එලෙස මියගොස් තිබුණේ කුලියාපිටිය, ගයියාල ප‍්‍රදේශයේ ස්වයං නිරෝධායනයට ලක්කර තිබූ නිවසක පදිංචිකරුවෙකු වූ 80 හැවිරිදි පුද්ගලයෙක් ය.

අදාළ මියගොස් ඇති තැනැත්තාද කුලියාපිටියේ කොවිඩ් ආසාදිතයින් කිහිපදෙනෙකු වාර්තා වූ මංගල උත්සවයකට සහභාගී වූ අයෙකුගේ පියෙකු වූ අතර කලක් රෝගාතුරව ප‍්‍රථීකාර ලබමින් සිටි අයෙක් බවද වාර්තා වේ. කෙසේවෙතත්
එම මංගල උත්සවයේ මනාලයා ආසාදිතයෙකු වූ බව දැනගත් වහාම අදාළ මරණකරුගේ නිවසේ සියලුම දෙනා ස්වයංනිරෝධායනයට ලක් කර ඇත. එසේ නිරෝධායනය වෙමින් සිටියදී අද (21) අලුයම පැවති රෝගාබාධ තරමක් උත්සන්නව නිවසේදීම මියගොස් සිට ඇත.

එම මෘතදේහය සෞඛ්‍ය වෛද්‍ය නිලධාරී උත්පල සංකල්ප ඇතුලු පිරිසකගේ පූර්ණ අධීක්‍ෂණය යටතේ දැඩි සෞඛ්‍ය ආරක්‍ෂිත ක‍්‍රමවේද අනුගමනය කරමින් කුලියාපිටිය විවිධසේවා සමූපකාර සමිතියේ වාහනයක් භාවිතයෙන් කුලියාපිටිය ශික්‍ෂණ රෝහල් මෘත ශරීරාගාරයට ප‍්‍රවාහනය කරවීමට එම සමිතියේ සභාපතිවරයා කටයුතු කර තිබූ අතර දේහය ප‍්‍රවාහනය කිරීමෙන් පසුව රථය හා රියදුරු විෂබීජ හරණයට ලක්කිරීමට කටයුතු කර තිබුණා.

දේහයෙන් සාම්පල කිහිපයක් ලබාගෙන පීසීආර් පරීක්‍ෂාවකට යැවීමට නියමිතව ඇති අතර එහි ප‍්‍රථිපලය අනුව අදාළ පුද්ගලයා මියගොස් ඇත්තේ කොවිඞ් වැළඳීමෙන්ද යන්න තහවුරු කරගැනීමට නියමිත බව රෝහල් ආරංචි මාර්ග පවසයි. එහෙයින් දේහය සම්බන්ධ ඉදිරි කටයුතු කිසිවක් අදාළ සාම්පල පරීක්‍ෂණ වාර්තා පැමිණෙනතෙක් සිදු කිරීම අත්හිටුවා තිබුණා.

-Neth News-

Ads
Click to comment

Leave a Reply

Your email address will not be published. Required fields are marked *

To Top