ශ්‍රී ලංකාවෙන් වාර්තා වූ සමස්ත කොවිඩ් – 19 හෙවත් නව කොරෝනා වෛරසය ආසාදිත වූ පුද්ගලයින් ගණන අද (19) දින පෙරවරු 10.00 වන විට 2902ක් ලෙස සටහන් වන බව වසංගත රෝග විද්‍යා අංශය වාර්තා කරයි.
ගත වූ පැය 24 තුළ දී ආසාදිතයින් දෙදෙනෙකු හඳුනාගෙන ඇති අතර ඉන් එක් අයෙක් සුඩාන් සිට ද, අනෙක් පුද්ගලයා එක්සත් අරාබි එමීර් රාජ්‍යයේ සිට ද මෙරටට පැමිණ නිරෝධායනය වෙමින් සිටි පුද්ගලයින් වේ.
ඒ අනුව, අද (19) පෙරවරු 10.00ට වාර්තා වී ඇති රෝගීන් 2902 දෙනා අතරින්,
- වෙනත් රටවල්වලින් පැමිණි (විදේශික) – 34
- වෙනත් රටවල්වලින් පැමිණ (ලාංකික) – 975
- නාවික හමුදා සාමාජිකයින් සහ ආශ්‍රිතයින් – 950
- කන්දකාඩු පුනරුත්ථාපන මධ්‍යස්ථාන සාමාජිකයින් සහ ආශ්‍රිතයින් – 630
- වෙනත් – 313
එමෙන්ම, අද (19) පෙරවරු 10.00 වන විට තවත් ආසාදිතයින් පස් දෙනෙකු පූර්ණ සුවය ලබා රෝහලවලින් පිටව ගොස් ඇති බව වසංගත රෝග විද්‍යා අංශය වාර්තා කරයි. ඒ අනුව, මෙරට වාර්තා වූ ආසාදිතයින්ගනේ 2760 දෙනෙකු සුවය ලබා ඇත. දැනට වාර්තා වන සක්‍රීය ආසාදිතයින් ගණන 131ක් වේ.
ඒ අනුව, මේ වන විට මෙරටින් වාර්තා වූ සමස්ත රෝගීන් 2902ක ප්‍රමාණයට සාපේක්ෂව සුවය ලැබූ ප්‍රමාණය 95%ක් ලෙස වාර්තා වේ. සක්‍රීය ආසාදිතයින් ප්‍රමාණය 4.5%ක් දක්වා අඩු වී තිබේ. ජීවිතක්ෂයට පත් වූ ප්‍රමාණය 0.38%ක් ලෙස ද සටහන් වේ.
මේ දක්වා ශ්‍රී ලංකාවේ සිදු කර ඇති පී.සී.ආර්. පරීක්ෂණ ප්‍රමාණය 195,025ක් වේ. ශ්‍රී ලංකාවේ එක් දිනකදි සිදු කළ වැඩිම පී.සී.ආර්. පරීක්ෂණ ප්‍රමාණය වන 3505ක් වූ ප්‍රමාණය ඊයේ (18) වන දිනය තුළ දී සිදු කර ඇත.
මේ මාසයේ දී වාර්තා වූ ආසාදිතයින් ගණන සහ සුවය ලැබූ ගණන පහතින් දැක්වේ.
වසංගත රෝග විද්‍යා අංශය වාර්තා කරන අන්දමට අද (19) දින පෙරවරු 10.00 වන විට එම රෝහල්ගතව ප්‍රතිකාර ගනිමින් සිටි රෝගින් 131 දෙනාගෙන්,
- ජාතික බෝවන රෝග විද්‍යායතනයේ 19ක් ද,
- වැලිකන්ද මූලික රෝහලේ 81ක් ද,
- ඉරණවිල රෝහලේ 13ක් ද,
- මිනුවන්ගොඩ මූලික රෝහලේ 18ක් ද වශයෙන් රෝහල්ගතව ප්‍රතිකාර ලබමින් සිටියි.
එමෙන්ම, පුද්ගලයින් 62 ක් සැක සහිතව රෝහල්ගතව වෛද්‍ය අධික්ෂණය යටතේ පසුවේ. ජීවිතක්ෂයට පත් වූ රෝගීන් ගණන 11කි. අවසන් වරට කොරෝනා ආසාදිත මරණය වාර්තා වූයේ ජුනි මාසයේ 01 වැනිදා වේ.
