කන්දකාඩු පොකුරට සම්බන්ධ තවත් කොරෝනා ආසාදිත වූ පුද්ගලයින් 10 දෙනෙකු එකතු වී ඇති බව රජයේ ප්‍රවෘත්ති දෙපාර්තුමේන්තුව සඳහන් කරනවා. ඒ අද (24) පස්වරු 3.00 වන විට තවත් ආසාදිතයින් 10 දෙනෙකු වාර්තා වීමත් සමඟයි. ඒ අනුව, මේ වන විට කන්දකාඩු පොකුරෙන් වාර්තා වූ සමස්ත ආසාදිතයින් ගණන 573 දක්වා ඉහළ ගොස් තිබෙනවා.
වාර්තා වූ ආසාදිතයින් 10 දෙනාගෙන් 9 දෙනෙකු කන්දකාඩු පුනරුත්ථාපන මධ්‍යස්ථානයේ රැඳවියන් වන අතර අනෙක් ආසාදිතයා කන්දකාඩු මධ්‍යස්ථානයේ ආසාදිතයෙකුගේ ආශ්‍රිතයෙක් බව රජයේ ප්‍රවෘත්ති දෙපාර්තුමේන්තුව වාර්තා කරයි.
එමෙන්ම, ශ්‍රී ලංකාවෙන් වාර්තා වූ සමස්ත කොවිඩ් – 19 ආසාදිතයින් ගණන 2763 ලෙස වාර්තා වේ. වසංගත රෝග විද්‍යා අංශය වාර්තා කළ අන්දමට, අද (24) පෙරවරු 10.00 වන විට තවත් ආසාදිතයින් 17 දෙනෙකු පූර්ණ සුවය ලබා රෝහල්වලින් පිටව ගොස් තිබෙනවා.
ඒ අනුව, දැනට ශ්‍රී ලංකාවෙන් වාර්තා වන සක්‍රීය ආසාදිතයින් ගණන 658ක් වේ. තවත් පුද්ගලයින් 63 දෙනෙකු සැක පිට වෛද්‍ය අධීක්ෂණයේ පසුවේ. ජීවිතක්ෂයට පත් වූ ආසාදිතයින් ගණන 11කි.
