Advertise with Giraya
NEWS

සක්‍රීය ආසාදිතයින් ගණන 103 දක්වා පහළට

ශ්‍රී ලංකාවේ කෝවිඩ් – 19 හෙවත් නව කොරෝනා වෛරසය වැළඳී සුවය ලැබූ ප්‍රමාණය අද (08) දිනයේ 1967 ක් දක්වා ඉහළ ගොස් ඇති බව වසංගත රෝග විද්‍යා අංශය වාර්තා කරයි. ඒ, අද (08) පෙරවරු 10.00 වන විට තවත් රෝගීන් 12 දෙනෙකු පූර්ණ සුවය ලබා රෝහල්වලින් පිටව යාමත් සමඟය.

මේ අතර, අද (08) දිනය තුළදී මෙතෙක් කිසිදු රෝගියෙකු වාර්තා වි නොමැති අතර ඊයේ (07) දිනයේ දී ආසාදිතයින් සිව් දෙනෙකු වාර්තා වී තිබේ. ඔවුන් අතර නාවික හමුදා සාමාජිකයෙක් ද වන අතර දින 11කට පසුව නාවික හමුදාවෙන් ආසාදිතයෙකු ඉයක්කච්චි නිරෝධායන මධ්‍යස්ථානයෙන් වාර්තා වූයේ ඊයේ දිනයේ දී ය. වාර්තා වූ අනෙක් ආසාදිතයින් තිදෙනාගෙන් එක් අයෙකු වැලිකඩ බන්ධනාගාරයේ රැඳවියෙක් වේ. අනෙක් දෙදෙනාගෙන් එක් අයෙකු රියාද් සිට සිට මෙරටට පැමිණි පුද්ගලයෙක් වන අතර අනෙක් පුද්ගලයා ඉතියෝපියාවේ සිට මෙරටට පැමිණි පුද්ගලයෙකු වේ.

ඒ අනුව, මෙරටින් වාර්තා වූ සමස්ත රෝගීන් 2081 ක ප්‍රමාණයෙන් මේ වන විට වාර්තා වී ඇති රෝගීන්ට සාපේක්ෂව සුවය ලැබූ ප්‍රමාණය 94%ක් ලෙස ද, සක්‍රීය ආසාදිතයින් ප්‍රමාණය 5%ක් ලෙස ද, ජීවිතක්ෂයට පත් වූ ප්‍රමාණය 0.53%ක් ලෙස ද සටහන් වේ.

අප්‍රේල් මස 22 වනදායින් පසුව වාර්තා වූ රෝගීන්ගෙන් බහුතරය නාවික හමුදා සාමාජිකයින් වන අතර පසුගිය අප්‍රේල් මස 30 වනදායින් පසුව මෙතෙක් බාහිර සමාජයෙන් රෝගීන් වාර්තා වී නොමැති බව සෞඛ්‍ය අංශ වාර්තා කරයි. එනම් මාස මැයි මාසයේ සහ ජුනි මාසයේ දී බාහිර සමාජයෙන් රෝගින් වාර්තා වී නොමැත.

දැනට වාර්තා වූ රෝගීන්ගෙන් 905 දෙනෙකු නාවික හමුදාවේ සාමාජිකයින් වේ. එම ආසාදිතයින්ගෙන් 892 දෙනෙකුම සුවය ලබා ඇත. දැනට රෝහල්ගතව ප්‍රතිකාර ගනු ලබන්නේ කොරෝනා ආසාදිත වූ නාවික සෙබළුන් 13කි.

වාර්තා වූ රෝගීන්ගෙන් 788 දෙනෙකු විදෙස්ගතව මෙරටට පැමිණි ලාංකිකයින් වේ. එම පුද්ගලයින් අතරින් 732 දෙනෙකුම පසුගිය අප්‍රේල් මස 22 වන දිනට පසුව තහවුරු කරන ලද කොරෝනා ආසාදිතයින් වේ.

එමෙන්ම, වාර්තා වූ රෝගීන් අතරින් 77 දෙනෙකු දේශියව හඳුනාගත් අය ද, 15 දෙනෙකු අනෙකුත් හමුදාවන්ට අයත් පුද්ගලයන් ද, 30 දෙනෙකු විදෙශිකයන් ද වේ.

මේ දක්වා ශ්‍රී ලංකාවේ සිදු කර ඇති පී.සී.ආර්. පරීක්ෂණ ප්‍රමාණය 116,375ක් වේ. මැයි මාසය තුළ දී සිදු කරන ලද පී.සී. ආර්. පරීක්ෂණ ප්‍රමාණය 42,873ක් ද, ජුනි මාසය තුළ සිදු කරන ලද පී.සී. ආර්. පරීක්ෂණ ප්‍රමාණය 42,455 වේ.

මේ මාසයේ දී සිදු කරන ලද පී.සී.ආර්. පරීක්ෂණ ප්‍රමාණය සහ වාර්තා වී ඇති රෝගීන් ගණන පහතින් දැක්වේ.

  • ජුලි 01 – 1,296 හඳුනාගෙන ඇති නව ආසාදිතයින් ගණන – 07
  • ජුලි 02 – 1,399 හඳුනාගෙන ඇති නව ආසාදිතයින් ගණන – 12
  • ජුලි 03 – 1,519 හඳුනාගෙන ඇති නව ආසාදිතයින් ගණන – 03
  • ජුලි 04 – 852 හඳුනාගෙන ඇති නව ආසාදිතයින් ගණන – 05
  • ජුලි 05 – 599 හඳුනාගෙන ඇති නව ආසාදිතයින් ගණන – 02
  • ජුලි 06 – 1290 හඳුනාගෙන ඇති නව ආසාදිතයින් ගණන – 01
  • ජුලි 07 – 1610 හඳුනාගෙන ඇති නව ආසාදිතයින් ගණන – 04

මැයි මාසය තුළ දී වාර්තා වී ඇති රෝගින් ගණන 971ක් ද, ජුනි මාසය තුළ වාර්තා වූ රෝගීන් ප්‍රමාණය 414ක් වේ. මැයි මාසය තුළ සුවය ලැබූ ගණන 646 ක් ද ජුනි මාසය තුළ දී සුවය ලැබූ ගණන 910ක් ද වේ.

වසංගත රෝග විද්‍යා අංශය වාර්තා කරන අන්දමට අද (08) දින පෙරවරු 10.00 වන විට එම රෝහල්ගතව ප්‍රතිකාර ගනිමින් සිටි රෝගින් 103 දෙනාගෙන්,

  • ජාතික බෝවන රෝග විද්‍යායතනයේ 12ක් ද,
  • වැලිකන්ද මූලික රෝහලේ 30 ක් ද,
  • මුල්ලේරියාව රෝහලේ 00 ක් ද,
  • ඉරණවිල රෝහලේ 07ක් ද,
  • කාතාන්කුඩි රෝහලේ 25ක් ද,
  • හෝමාගම රෝහලේ 00ක් ද,
  • මිනුවන්ගොඩ මූලික රෝහලේ 19ක් ද,
  • තෙල්දෙණිය මූලික රෝහලේ 01ක් ද,
  • යුද හමුදා රෝහලේ 05ක් ද,
  • කඹුරුගමුව මහ රෝහලේ 03ක් ද වශයෙන් රෝහල්ගතව ප්‍රතිකාර ලබමින් සිටියි.
  • තවත් එක් රෝගියෙකු රෝහල වෙත යොමු කරමින් සිටියි.

එමෙන්ම, පුද්ගලයින් 56 ක් සැක සහිතව රෝහල්ගතව වෛද්‍ය අධික්ෂණය යටතේ පසුවේ. ජීවිතක්ෂයට පත් වූ රෝගීන් ගණන 11කි. අවසන් වරට කොරෝනා ආසාදිත මරණය වාර්තා වූයේ ජුනි මාසයේ 01 වැනිදා වේ.

Ads
Click to comment

Leave a Reply

Your email address will not be published. Required fields are marked *

To Top