කොළඹ, ගම්පහ, කළුතර, පුත්තලම, මහනුවර හා යාපනය දිස්ත්රික්ක හැර සෙසු දිස්ත්රික්ක 19 ලබන 20 දා සිට ඇඳිරි නීතිය ඉවත් කරමින් යළි විවෘත කිරීමට බොහෝදුරට ඉඩ ඇතැයි රජයේ ආරංචි මාර්ග සඳහන් කරයි.
එසේම, දැනට වසා දමා ඇති කටුනායක ජාත්‍යන්තර ගුවන්තොටුපල හුවමාරු (TRANSIT) ගුවන්යානා සඳහා 21 වැනිදා සිට විවෘත කරන්නට ද බොහෝදුරට ඉඩ තිබේ.
මේ අතර දැනට විවෘත නොකෙරෙන දිස්ත්රික්ක හය ලබන තිස් වැනිදා විවෘත කිරීමටද ඉඩ ඇතැයි රජයේ ආරංචි මාර්ග සඳහන් කරයි. කෙසේ වෙතත් මුලින් සෙසු දිස්ත්රික්ක විවෘත කිරීමෙන් පසුව ඇතිවන තත්ත්වය අනුව එම තීරණය ගැනීමට නියමිතය.
මේ අතර රාජ්‍ය සේවකයන්ගේ රාජකාරි කොටස් වශයෙන් ආරම්භ කිරීමට ද රජය සැලසුම් කර තිබේ. ආරම්භයේ දී කොළඹ ඇතුළු අවදානම් දිස්ත්රික්කවල ඒ ඒ කාර්යාල වල රජයේ සේවකයන්ගෙන් දිනපතා කොටසක් පමණක් සේවා සඳහා කැඳවීමට නියමිතය. ඒ අනුව මුල් දිනයේ සේවය කරන පිරිස සෙසු දින හතර නිවසේ සිට සේවා වල නිරත විය යුතුය. ඊළඟ දිනයේ සේවය කරන පිරිසට ඊළඟ දින හතර නිවසේ සිට රාජකාරියේ නිරතවීමට ඉඩ ලැබේ. මේ ආකාරයට දිනපතා අදාල සේවා ස්ථානවල සේවකයන් පහෙන් එක කොටසක් බැගින් සේවයේ යෙදවේ.
අවදානම් අඩු සෙසු දිස්ත්රික්කවල දිනක් හැර දිනක් සේවකයන් අඩක් බැගින් ආයතනයට පැමිණ රාජකාරි කිරීමට ද යෝජනා වී තිබේ.
